தமிழ்க் கல்விக் கழகத்தின் நிருவாகச் செயல்நெறியின் ஒழுங்கமைப்பில் வட மத்திய மாநிலத்துக்கான 35ஆவது அகவை நிறைவு விழா ஆன்ஸ்பேர்க் அரங்கில் சிறப்பாக நடைபெற்றது. அறங்கொண்டு பணி செய்யும் ஆசான்களையும் ஆசான்களின் திறன் கொண்டு வாகைசூடும் மாணவர்களையும் 14 ஆண்டுகள் தமிழ்மொழியைக் கற்றுத் தேர்ச்சி பெற்ற மாணவர்களையும் இவர்களின் கூட்டுழைப்பின் விளைவாகத் தமிழாலயங்கள் பெற்ற வெற்றிகளுக்கான மதிப்பளிப்புகள் எனப் பல்வகை மதிப்பளிப்புகளைத் தன்னகத்தே கொண்டதாகத் தமிழ்க் கல்விக் கழகத்தின் அகவை நிறைவு விழா அமைந்திருந்தது.
09:30மணிக்கு தமிழர் ஒருங்கிணைப்புக் குழுவின் யேர்மனியக் கிளைப் பொறுப்பாளர் திரு. யோன்பிள்ளை சிறிரவீந்திரநாதன் அவர்கள் பொதுச்சுடர் ஏற்றிவைத்தமையைத் தொடர்ந்து, ஆன்ஸ்பேர்க் நகரத் துணைமுதல்வர் திரு. பீற்றர் புளுமெ, தமிழர் ஒருங்கிணைப்புக் குழுவின் பொறுப்பாளர் திரு. யோன்பிள்ளை சிறிரவீந்திரநாதன், யேர்மன் தமிழ்ப் பெண்கள் அமைப்பின் பொறுப்பாளர் திருமதி வசந்தி மனோகரன், தமிழ் இளையோர் அமைப்பின் பொறுப்பாளர் செல்வன் சயந்தன் கேதீஸ்வரன், தமிழர் ஒருங்கிணைப்புக் குழுவின் வடமத்திய மாநிலச் சிறப்புப் பொறுப்பாளர் திரு. கணபதிப்பிள்ளை ஜெயக்குமார், தமிழர் ஒருங்கிணைப்புக் குழுவின் மத்திய மாநிலப் பொறுப்பாளர்களான திரு.கந்தையா சிறிகந்தவேல், திரு.சிவநேசன் சுதர்சன், தமிழர் ஒருங்கிணைப்புக் குழுவின் வடமத்திய மாநிலப் பொறுப்பாளர் திரு. முத்துவேல் ஜெயவலதாஸ், தமிழர் ஒருங்கிணைப்புக் குழுவின் மத்திய மாநிலத் துணைப்பொறுப்பாளர் சந்திரன் லதக்குமார் மற்றும் யேர்மன் தமிழர் கலை பண்பாட்டுக் கழகத்தின் மூத்து நடன ஆசிரியரான திருமதி சாவித்திரி சரவணன் ஆகியோர் மங்கலவிளக்கேற்றி வைக்க, அகவை நிறைவு விழாச் சிறப்புடன் தொடங்கியது.
தமிழ்க் கல்விக் கழகத்தின் பொறுப்பாளர் செம்மையாளன் திரு. செல்லையா லோகானந்தம் அவர்களின் வரவேற்புரையைத் தொடர்ந்து, மதிப்பளிப்புகள் தொடங்கின. அனைத்துலகப் பொதுத்தேர்வு, தமிழ்த்திறன் போட்டி ஆகியவற்றில் வெற்றிபெற்ற வெற்றியாளர்களுக்கும் மற்றும் 5,10,15ஆண்டுகள் பணியாற்றிய ஆசான்களுக்கான மதிப்பளிப்புகளோடு, 20 ஆண்டுகள் பணியாற்றியவர்களுக்கு தமிழ் வாரிதி என்றும் 25 ஆண்டுகள் பணியாற்றியவர்களுக்கு தமிழ் மாணி என்றும்; 30 ஆண்டுகள் பணியாற்றியவர்களுக்கு முப்பது ஆண்டுகளைக் குறிக்கும் மூன்று உடுக்கள் பொறிக்கப்பட்ட பதக்கமும் வழங்கி மதிப்பளிப்புகள் நடைபெற்றன.
20 ஆண்டுகள் பணியாற்றி தமிழ் வாரிதி என்ற பட்டத்தினைத் தமிழ்க் கல்விக் கழகத்தின் வடமத்திய மாநிலச் செயற்பாட்டாளர்களில் ஒருவரான திரு. தாமோதரம்பிள்ளை நற்குணராசா மற்றும் ஆன்ஸ்பேர்க் தமிழாலய ஆசிரியை திருமதி வள்ளிமலர் பேரின்பராசா ஆகியோரும் 25 ஆண்டுகள் பணியாற்றி ஷதமிழ் மாணி| என்ற பட்டத்தினை எசன் தமிழாலய ஆசிரியை திருமதி திவியா தவராசன் மற்றும் கஸ்லிங்கவுசன் தமிழாலய ஆசிரியை திருமதி றஞ்சினி நடராசா ஆகியோரும் தமிழாலயங்களில் 30 ஆண்டுகள் பணிநிறைவு பெற்றமையை மதிக்கும் வகையில் மூன்று உடுக்கள் பொறிக்கப்பட்ட சிறப்புப் பதக்கத்தினை டோட்முன்ட், எசன், ஓபர்கவுசன், கஸ்லிங்கவுசன், இறைனே தமிழாலயங்களின் ஆசிரியர்களான திருமதி கிருபாறதி சிவராம், திருமதி அகல்யா குகன், திரு. கந்தையா சிவகுமார், திருமதி வரதக்சனி தனபாலசுந்தரம் ஆகியோருக்கும் ஓபர்கவுசன் தமிழாலய நிருவாகி திருமதி அதிரூபராணி கருணாநிதி அவர்களும் பெற்றுக்கொண்டனர்.
பொதுத்தேர்வு, தமிழ்த்திறன், கலைத்திறன் போன்றவற்றில் மாணவர்கள் பெற்ற வெற்றிகளின் அறுவடையாகத் தமிழாலயங்கள் பெற்ற புள்ளிகளினடிப்படையில் சிறந்த தமிழாலயங்களுக்கான மதிப்பளிப்புகளும் இடம்பெற்றன. கலைத்திறன் மாநிலப் போட்டியில் வாறன்டோர்வ், டோட்முன்ட் மற்றும் எசன் தமிழாலயங்கள் முறையே 1ஆம், 2ஆம், 3ஆம் நிலைகளையும் கலைத்திறன் போட்டியில் நாடுதழுவிய மட்டத்தில் வாறன்டோர்வ் தமிழாலயம் 3ஆம் நிலையைப் பெற்றமைக்கான மதிப்பளிப்புகள் வழங்கப்பட்டன.
மழலையராக இணைந்து 14 ஆண்டுகள் தமிழ்மொழிக் கற்றலில் சித்திபெற்று நிறைவுசெய்த மாணவர்கள்; சிறப்பாக ஒழுங்கமைக்கப்பட்ட முறையிலே மதிப்பளிக்கப்பட்டனர். மாணவர்களின் உரை, கவிதை, எழுச்சிப்பாடல்கள் மற்றும் எழுச்சி நடனங்கள் எனக் கலைநிகழ்வுகளுமாக நடைபெற்ற அகவை நிறைவு விழா, தமிழ்த் தேசத்தின் விடியலுக்கான நம்பிக்கையைப் பறைசாற்றியவாறு 19:30மணிக்கு வடமத்திய மாநிலத் தமிழாலயங்களின் அகவை நிறைவுவிழா நிறைவுற்றது. எதிர்வரும் வாரங்களில் தமிழ்க் கல்விக் கழகத்தின் நிருவாகப் பொறிமுறைக்கேற்ப வகுக்கப்பட்டுள்ள ஏனைய மாநிலங்களிலும் அகவை நிறைவு விழா நடைபெறவுள்ளமை குறிப்பிடத்தக்கதாகும்.
