பிரான்ஸ் முழுவதும் தொழிலாளர் சங்கங்கள், மாணவர்கள் மற்றும் “மஞ்சள் அங்கி” இயக்கத்தினர் இணைந்து இன்று சனிக்கிழமையன்று போராட்டப் பேரணிகளை நடத்தத் திட்டமிட்டுள்ளனர். கல்வி நிலைமைகளை மேம்படுத்துதல் மற்றும் மக்களின் வாங்கும் சக்தியை உயர்த்துதல் உள்ளிட்ட கோரிக்கைகளை முன்வைத்து இந்தப் போராட்டங்கள் நடைபெறவுள்ளன.
புவியியல் காண்
கடந்த சனிக்கிழமை நடைபெற்ற போராட்டங்களின்போது குறைந்தது 5.5 லட்சம் பேர் பங்கேற்றதாகக் கூறப்படும் நிலையில், பல்வேறு நகரங்களில் கலவரம், கடைகள் உடைப்பு மற்றும் சூறையாடல் சம்பவங்கள் நிகழ்ந்தன. இதுபோன்ற வன்முறைச் சம்பவங்கள் மீண்டும் நடைபெறக்கூடும் என்ற அச்சத்தில், நாடு முழுவதும் சுமார் 70,000 காவல்துறையினர் பாதுகாப்புப் பணியில் ஈடுபடுத்தப்படவுள்ளனர்.
புதிய போராட்டங்களை முன்னிட்டு, பாரிஸ் உள்ளிட்ட நகரங்களில் உள்ள ஆடம்பரப் பொருட்கள் விற்பனையகங்கள் தங்களது கண்ணாடி ஜன்னல்களை மரப்பலகைகளால் மூடியுள்ளன. சில கடைகள் பாதுகாப்புக் காவலர்களை நியமித்துள்ளதுடன், சில விற்பனையகங்கள் தற்காலிகமாக மூடப்படவும் திட்டமிட்டுள்ளன.
உலகின் அதிக சுற்றுலாப் பயணிகளை ஈர்க்கும் நாடுகளில் ஒன்றான பிரான்ஸ், சேனல் கைப்பைகள் மற்றும் ஹெர்ம்ஸ் ஸ்கார்ஃப்கள் போன்ற ஆடம்பரப் பொருட்களை வாங்க வரும் வெளிநாட்டு வாடிக்கையாளர்களால் கணிசமான வருவாயைப் பெறுகிறது. எனினும், பாரிஸ், மார்சேய் மற்றும் போர்டோ உள்ளிட்ட நகரங்களில் கடந்த வாரம் நூற்றுக்கணக்கான கடைகள் சேதப்படுத்தப்பட்டு சூறையாடப்பட்டதாகத் தெரிவிக்கப்படுகிறது.
பாதுகாப்பு நடவடிக்கைகளின் ஒரு பகுதியாக, பாரிஸில் உள்ள அருங்காட்சியகங்களும் மூடப்பட்டுள்ளன. கலவரத்தைக் கட்டுப்படுத்த காவல்துறையினர் தடியடிகள், கண்ணீர்ப் புகைக் குண்டுகள், ஒலி எறிகுண்டுகள் மற்றும் நுரைக் குண்டு ஏவுகருவிகள் உள்ளிட்ட உபகரணங்களைத் தயாராக வைத்துள்ளனர். போராட்டக் கூட்டங்களைக் கட்டுப்படுத்துவதற்காக ஒளிரும் விளக்குகள் பொருத்தப்பட்ட கலவரத் தடுப்புக் கேடயங்களும் பயன்படுத்தப்படவுள்ளன. கூட்டத்தைக் கட்டுப்படுத்தும் நடவடிக்கைகளில் மின்சார அதிர்ச்சித் துப்பாக்கிகளைப் பயன்படுத்தத் தடை விதிக்கப்பட்டுள்ளது.
போராட்டங்களின் போது பொதுமக்களின் பாதுகாப்பையும், வணிக நிறுவனங்களின் சொத்துகளையும் பாதுகாப்பதற்கான நடவடிக்கைகளை பிரெஞ்சு அதிகாரிகள் தீவிரப்படுத்தியுள்ளனர்.
